Lama doh
Mari doktong
Pah malang tumbah
Mari kecap
Hok pahit leppang
Hok masang rebbang
Hok tawor heber
Hok masing pekkok
Hok manih leteng
Nyer kammir belaka
Jadi pedomang dang pengajorang
Lama doh
Mari newwor
Pakat kutip bekal
Ada hok wat alik bekal
se supik rok rak
Ada hok se jabir
Ada hok segalah kussang
Ada hok se gudang
Ibaraknya gittulah
Ada hok banyok
Ada hok siket
Ada hok dok wat alik satusal
Mitok jauhlah kita
Lama doh
Duk dalang bermaing
Duk dalang berhibur
Ralik dengang dunia
Duk kejor ke pitih ke kuasa
Nyakit wahan dang hubbun dunia
Ger kattu duk kennang ke sinor lapu
Bahang lagho
Koho-koho nok balik doh kita ning
Mata koho dok napok
Gigi koho luok
Kaki koho ruyung
Rambut koho mutih koho botok
Reng koho tak dop
Koho sari koho dok rok
Koho-koho nok balik doh kita ning
Buleh jadi tahung depang
Muking bulang depang
Bakali jugop minggu depang
Kena molek kekgi doh
Dok derah sesaat
Dok lambak sesaat
Koho-koho nok balik doh kita ning
Dok tunggu kita racang
Dok nati kita stengbai
Belang-belang dok seke
Belang-belang dok sedor
Tengoh-tengoh ralik
Koho-koho nok balik doh kita ning
Dokkang pah ceroh nok duk sinning
hok Tuhang belake kang
Yer bui pinjang je
Sapa masa
Yer ambik balik ah hok Yer
Koho-koho nok balik doh kita ning
Semoga balik dalang keadaang comey lotey
Bawok bekal banyok ke negeri abadi
Dang tobak sebelung abih umur
Gi dalang keadaang husnul khatimah
Ngadap Tuhang
Rabbul jalil.
Amin ya rabbal a’lamin
Bekok Cobbong
25 Rabi’ulakhir 1441 Hijrah
22 Disember 2019
No comments:
Post a Comment